بلسم لتنعيم الشعر الجاف
يا هلا بنات كلنا منعاني من الشعر الجاف اللي بيعقد ويتقصف وبيخسر حيويته مهما استخدمنا بلسم وكريمات هالخلطة البسيطة اللي رح أحكيلكم عنها هي بلسم طبيعي بتصنعيه بنفسك بمكونات موجودة بأي بيت والنتيجة معجزة شعرك رح يصير ناعم كالحرير ومسرح ولامع من أول استخدام بس بدي أنبهكن على شي مهم قبل ما تبلشوا هالوصفة مش لكل الناس فخليني أوضحلكن مين قدها ومين لأ.
المقادير:
نص ملعقة صغيرة زبدة شيا مذوبة تذويب خفيف في المايكرويف الزبدة هاي غنية بالفيتامينات والأحماض الدهنية اللي بتغذي الشعر الجاف والتالف وبتخترق الشعرة من جوا فبترطبها ترطيب حقيقي مش سطحي.
أقل من نص ملعقة صغيرة زيت جوز الهند زيت جوز الهند من الزيوت القليلة اللي بتقدر تدخل لجوا الشعرة وتقويها من الداخل وبتحميها من التقصف وبتخليها لامعة.
ثلاث إلى أربع ملاعق كبيرة من البلسم اللي تستخدمينه والمناسب لشعرك اختاري بلسم كويس يكون مرطب ومناسب لنوع شعرك لأنو هو الأساس يلي رح يخفف من الزيوت ويخلي الخلطة سهلة التوزيع.
طريقة التحضير:
في صحن صغير ذوبي زبدة الشيا بالمايكرويف لثواني معدودة بس عشان تصير كريمية لينة ولا تسخنيها كتير عشان خواصها ما تخرب بعدين ضيفي زيت جوز الهند واخلطيهم مع بعض كويس بعدين ضيفي البلسم بالتدريج وقلبي المكونات كلها مع بعض لحد ما يصير عندك خليط كريمي ناعم ومتجانس.
طريقة التطبيق:
بعد ما تغسلي شعرك بالشامبو وتشطفيه كويس خدي الخلطة وابدأي وزعيها على شعرك من تحت بس يعني من نص الشعرة نازلة باتجاه الأطراف وممنوع منعاً باتاً توصلي للجذور أو فروة الرأس خصوصاً إذا شعرك بيميل للدهنية سيبي الخلطة على شعرك لخمس دقايق بالضبط ما تزيدي عن هالوقت عشان ما يدهن شعرك.
بعد الخمس دقايق اشطفي شعرك بالماء الدافي فقط لا تحطي شامبو ثاني واشطفيه زين ما زين وتأكدي إنك شلتي كل الخلطة بالكامل عشان ما يبقى أي دهون عالشعر تخلي شكله مدهون.
مين قد هالوصفة
الطريقة هاي بتنفع بس للشعر الجاف جداً والمتقصف والخشن واللي تعب من الصبغات أو الحرارة أما اللي شعرها دهني بطبيعته أو ناعم ورقيق أو عادي ما بينفع معها هالوصلة وراح تدهن شعرها وتصير النتيجة عكسية.
يعني لا تجي وحدة شعرها دهني أو عادي وتقول أنا جربتها ودهن معي ركزوا الله يعافيكم هالوصفة مخصصة للشعر الجاف فقط غيركن ما إلها عندي شي.
اوبالنهايه:
أنا جربتها شخصياً والله إنها جميلة بتخلي الشعر ناعم ومسرح وفيه لمعان وحيوية من أول استخدام إذا كان شعرك جاف وما لقيتي شي نافع معك جربي هالخلطة وما رح تندمي ونصيحة أخيرة ما تكثري استخدامها مرة بالأسبوع كافية عشان تحافظي على نتائجها وبألف صحة وعافية على شعركن.